|
by Muhammad Anvar Amin recorded and translated by Richard F. Strand 10. |
by Muhammad Anvar Amin recorded and translated by Richard F. Strand 10. |
| imo je kâtoa˜ de, â·kü âska, nüštruk pâ·se˜ źâ˜vor de imoa lâṭea˜ ṣuč kâřo. vâsut â·kiste˜, nire âmna quvâ ni nâmammiš_kti âmkioa˜ hu·kumât meṣ lot kâřo. lot kâřa to ča â·kiste˜ imo je âmkio˜ pâmüč, ina lâtri to bitifoqi oaso. šoa lot kea_kâřo kti i˜a âmkio˜_to pâpali☠ie sta bo nâ˜i â? lot imoa, šo de čâli·siň, suara âmna kombřom mânša vâpali☠âćti i˜_to suara, imo sta ptul âša sta pâta bo u [?]. imo kuiu, kṭol sâno bula nâ bo u [?] imo kâa_kummiš_kti, i˜_to vâpili☠oasâ i˜a gek düŋe lot kâřa·sa kti_gija_ku âska. â·kiste˜ i˜a gija_kâřo ina lot de, šo sta lot de o˜ qâbul nâ vo_âsam. ina de, ṣâŋe de, šo gija_kunâsaň kâča ina hu·kumât meṣ vâllâa bo âska mânša mubådâm_âsa_kunâsaň. strak de kâča peǧâmbâr oasta de ṭi˜ć nâ bo suara šoa ǧâlât kâřa·sa šoa hu·kumât to ṭâŋa vřâkuta·sâ kti i˜a je âmkio˜ pâmüč, viri âska bo sâip? âmki nâ ni višanâsi âkiste. pâṣuč. | |
| [R] kâča_âsi? âmkio˜ sta jeṣṭ. | |
| [A] âmkio˜ sta jeṣ mulo_âpźâl_âsi. âska vel to mulo_âpźâl_âsi, âska mulo_âpźâl de, âmkio˜ sta âmir_âsi; âska ˀubâidulo nom vo e xurzåbit_âsi âska, qumondon_âsi. â·kiste âmkioa˜, ina lâtri âmče˜ sta jeṣvor čarea sta bâlla. i˜a nire, â·ki šâŋir âsia˜. nâ˜i gâṇür âsia˜ bâlla â? šâŋir âsia˜ bâlla â? i˜a nire_âsia˜, o˜ pâṣuč_âsim â·ki niň. â·kiste˜, mânšoa˜ âri ienam o˜ć âmna nâřio i˜ sta pâṭi to nâ bâra_oasâ âmnoa˜ kti mâṣea˜ e vor o˜ mânšoa˜, ričât [?] nâmti, nâŋar oa·sim, egek to o˜š kunam bo â·ki âmna, jeṣ mi jeṣṭoa˜ âćti o˜ vânmiom suara püň mânša ina, kâta čaroa˜_gustâi; imo küře˜ suara io sta jeṣ vânmati io sta kudüm_kummiš_kti, âmnoa˜, bâřom o˜ć âkiste. nâ višanâsim â·ki o˜ nire i˜a, mânšoa˜ meṣ vodâ_kâřa·sa o˜ć ni ienam_kti. â·kiste âmki tâpol bâ âkiste o˜ć, mâjbur biti âmkio˜_to u âća˜ nâ bâti, pü gom âkiste. pü_giti, â·kiste i·a, lâtri, i˜a de purjik vilâ·i ča imo giti kombřom gomiš. giti kombřom, ou˜, â·kiste âvâl bâra_giti piti_gal ste˜ merořm gomiš âkiste. merořm, ina purjika vilâa·sa â? tu to nâ˜i â? | |
| [R] nâ˜i. | |
| [A] nâ vilâa·sa â? | |
| [R] nâ˜i nâ˜i nâ˜i. | |
| [A] nâ˜i o!. ina de gita sta bo nâ˜i â? imoa, kâmkuřoa˜ sta, tânsim küře˜ buna o; kâtoa˜ sta küře˜ buna ina lâṭea˜, pâṣuč âmna mânša bâbuaṭe_giti nâ buna kti ča˜, âmkioa˜, âska_kâřo ča. â·kiste pü giti püre, piti_gal, âmkioa˜ dić trić_vos vâsaŋařati mânšoa˜ viri, špâa sta bâlla. ânvâra de, qumondon_kummo mulo rustum âska_kummo kti âska_kâřa sta bâlla bo âkiste˜ â·ki i˜_to âmkioa˜, ina viri vilâiom âkiste. nâ de_kâroa˜_gom, âkiste âmki=mânša xâ·pu bunâsi âkiste˜. i˜a âmkio˜ meṣ ina lâtri qâbul_kti ča˜ bâra giti merořm gomiš. kâmu vâsiomiš. giti kâmu vâsti kâmu vâňi di vâsaŋařeati sârtâňi di vâa oa·si âmna sunti giti merořm gomiš. merořm âska mulo_âźartâli, hu·kumât meṣ ni ie to˜_to i˜a, vina·si nâ˜i â? âska. ṭâbea·si âska. â·kiste˜ âske sta totas to giti dâvo_kuň gom o˜ć. dâvo_kuň giti i˜a gija_kâřo, i·a, tu sta pütča de mâřa·sa, âska kâa mâřa·sala bo, âskea de o˜ nâ źâňanam. âska i˜a jâňi·sa, ou, i˜a nâ jâňi·sa bo i˜ sta mânšoa˜ jâňi·sa i˜ meṣ iela mânšoa˜, âskea tü bâkčanša â? nâ bâkčanša â kti kudeao i˜a. âska i˜ sta âaṭi mře to˜_to i˜_to, vâ·siât_kti mâřa·sa kti gija_ku. â·ki âmu čat to â·ki âmki âaṭia˜_to mujo·ita˜_to vâ·siât_kti mâřa·sa. i˜ sta mâra˜ målum nâ_âsa. o˜ć âduka mânša mâřa·salam â? ṣṭâla mânša mâřa·salam â, nâ˜i. [mâřa·sala â? nâ˜i m â? n...] nimal mânša mâřa·salam bo. imoa de hu·kumât meṣ lot, de imoa nâ_kâřa·si, eṭa mânšoa˜ o˜, mišeati mu·ṭâr to pâňu_âṭleati bâřom; suara pâput u vina·samiš ina i˜ sta, ina kitop to o˜š koř_âsa o˜ kâa kti [?] mřenâllam bo kti gija_kâřa·so âskea. â·kiste âska totas gija_ku, i˜ sta âaṭi tu to dâvo nâ_kâřa·sa o˜ć, tu to kâa dâvo nâ vo_âsam kti gija_ku. â·kiste˜ â·kü âske to dâvo kti ča˜, â·kiste ča iemmo kti, kombřom enâsamiš egek to âkiste âmki merio, imo to gija_ku, [laugh] imoa de ina inqilop imoa ubajea·sa. imo suara, imo šoa, jeṣ nâ_kâřa·samiš imo nâ iemmiš kti gija_ku âkiste. i˜a gija_kâřâ i˜ sta ˀivâs to šo jeṣ buň kti gija_kâřâ. suara ina jeṣ vor to de, kâa viri_âsa bo; ina jeṣ vor i˜a šo ptoň. šo merio kua jeṣ vânmanaň bo o˜ć, ina viri to ter_âsam_kti gija_kâřâ âkiste. â·kiste nâ˜i. tu düŋe nâ gija_kummiš. i˜a gija_kâřo "i˜ düŋe nâ gija_kunaň bo ku düŋe de gija_kunaň ina ṣuč de o˜ kâroanam šoa. âska mulo rustum bičorâ de â·ki kombřom_âsa, âska de ina viria˜_to nâ_âsa. nâ de âska pâṣuč iela_âsa. âska de âni šo meṣ mulo_âsala břâkom suara, ea˜, o˜ de i˜ sta viri to ter_âsam šoa pe utenam_kunam bo âkiste. di nâ_kâroa˜ ienâsi âkiste. e vor â·kiste sâip, âmkio˜_to, imoa mâṣa_kâřo âkiste. sunti gřâmia˜ mâṣa_kâřo šo de, imo to de nâ kudeaou˜ puta peṭti giâ˜_mi suara, ina imo sta inqilop âska sâ·i, put to di šoa nâ pe utařo. strak di šo di nâ_kâroa˜ ienaň kti e vor âmkioa˜ mâṣa_kâřa to âkiste˜, âmki âkiste˜ mâjbur bâ âkiste˜. imo meṣ sâniâ âkiste. dü vići moč merio di sâniâ âkiste giti kombřom gomiš o! ea âźor mânša giti kombřom vâsaŋařiomiš âkiste. | |
| kombřom vâsaŋařati ča â·kiste˜ di, mulo rustum_to gija_kâřa to âkiste˜ âska di, o˜, nâ bunam_kti mukio âkiste˜, kua [?] mukeâlla. mukea to ča â·kiste˜ imoa â·kü âska dâstikar jeṣ vânmi to â·küste˜ i˜a jeati ča˜ tâškilot i·peao âr gřoma˜ sta. küře˜ küře˜ gřoma˜_to suara, ura vânmio, küře˜ gřoma˜_to suara jeṣ vânmiâ. küře˜ gřoma˜_to mujo·ida˜ sta suntia˜ sta, âska, i·a lâtri i·peao. nom i·peaâ ča˜, egek mânša mujohid bâ kti. imoa tâqribân â·ki, dü dü nim âźor mujo·it_âsamiš. | |
| [R] šo âźor. | |
| [A] nâ nâ˜i. šo_âźor. oakuṇi_âźor. oakuṇi_âźor dü nim âźor mujo·id_âsamiš imo. â·kiste˜ âmki i·peati ča˜, vor vor to, vor vor to, ielâ_kâřâ âkiste. â·kiste i˜a de giti nire â·ki uštroṭ, niruk u âska bârgü_gul nâ_âsa â? â·kü je sta bo, qumondoni â·kü i·peao. â·küste ča âmki vor vor to vâlleati sâip, e bâṭa mânšoa˜ de, kuṇ nâmti, e bâṭa mânšoa˜ nire nire â·ki gâṇür nâmti, e bâṭa mânšoa˜ suara â·kü, ina, lânḍei sin, ina, bâdi·oa_pâpiṭ. â·kü ni_kâćeati ča˜, quvâ nire â·ki jena·si nâ˜i â? âmna gita kti i·peaâ âkiste. i·peati âmkio˜ sta âmki jeṣ de vilâiâ ča suara, šo sta nubât, âr gřoma˜_to, âmna šo sta, vor_âsa. ina vor to suara io sta vora ketta mânšea nâ punrea bo, âska suara ṣu go ḍen_âsa o suara kti, âmki pâṭia˜ âr gřoma˜_to pâṭi, nâmti ča˜, mâktup_ptâ âkiste. | |
| â·kiste˜ ina jâhot gita sta šâ·kal to dâvom_âsi nâ˜i â? o˜ć â·kiste˜ ketta to˜_to, kuiu giti, âmkio˜_to âtam oaźalom bo, o˜ i˜ sta šü˜ nâ vilânâsim ča o˜ć kuiu ienam_kti. âska o˜ kuiu vik ketta gřom_to gum_to ketta to˜_to vâsim_to â·ki kuiu âar ste ṣu přoala bâlla bo. řâdor di gâjâr di âćti â·kiste˜ â·ki bâmbort kunâsi. ü teti [?] vianâsi. kuiu_âta pšol vâsim_to âćti â·ki vianâsi! âska gi☠viala_âsi bo de kâi dâvâr [?] e vor âmki tâiorâa˜ âveti sâip âmna lâtri, turći˜ turći˜ mâin nâ˜i â? âmna. kür peṭli. âmki lâtria˜ ü_âṭleati bâraň ptula˜_to je âmki=źâŋgâla˜_to. e vor âkiste˜ âćti ča˜ âska ketta pšol to bim_to âskoa vianâsi. mânša jeati âćla bâlla â? â·ki i·a, âmkioa˜, źâňala mânšea, âvela bâlla â? o˜ć, ḍer bi·sam i·a viri to. âtre mânša pâido_kâřa·si nâ˜i â? âmkioa˜ nüštruk quvâ ni ie to˜_to â·ki mânša, âmkioa˜ břâkom mânša pâido_kâřa·si, ṭâŋa přeti. [end of tape] i˜a â·ki nâ_âsia˜ âmki i·a hu·kumât â·ki biliuk kudüm kâřa sta bâlla o˜ de âni pi·šâvur bâra oaźti oasom âni bâkul [?] vâlleaom nâ˜i â? â·ki âmki ina jârgâ ča iemmiš â jârgâ ni âćammiš_kti sâip, â·ki âtaň âmče˜ sta mânšoa˜ pâido kti ča sâip âmki, âmkioa˜ kudüm_kâřa sta bâlla ne? višanam o˜ć âkiste. | |
| [R] kâča målum âi â? | |
| [A] mânša de gek_kti målum âi ča â·ki eṭa mânša, â·ki ni âćti, hu·kumât to ni iela mânša målum âi i˜a drea vânmiâ âmki mânša. | |
| â·kiste˜, o˜ć âni ste˜ âta ienam bo â·ki de hu·kumât meṣ mânšoa˜ lot_kâřa·sa kti vilâ... âmki vilâa·sim nâ˜i â? kâča mânša, âsala mi [?] višti_âmkioa˜ küt kunam bo sâip âmna, eṭa mânša â·ki ni gustâi âkiste. ni giti â·kiste âmkioa˜ lâtri ča ptastâa, ča âvařastâa, čare de lâtri bâṭa_kâřa·sâ, pâc̣c̣eć sâtić lâk ṭâŋa vřâkâti sâip âmkioa˜ pâare kṣtořm, e dü tre_küř, kṣtořm, mânša âi; e dü tre kâta âi; e tre što_küř pâňure kombřom âaṭi âi. âmkio˜ pâmüč suara ina, e de ina, ina dâ·ut nüške˜ i˜a nom_tâřo nâ˜i â? ea de i·a_âsa. suara, e tre što de vâre ea di e [?] ǧulom râbi_kunta â·ki ürbřom źâňanša â? e lâtri. ea de âska_âsa, âske sta břos. sadiq. âskea nom_tenâsi suara, âmna ketta mânša ča utina sta=âsi [?] bo nâ˜i â? âmna kâta_gal ča iela mânša_âsi bo. âmna mânšoa˜, pâňu giti ča ina kudüm nâši·sa â·ki. imo, suara hu·kumât meṣ lot kummiš_kti â·ki âmkio˜_to ṭâŋoa˜ vřâkâti âkiste vâa_âćti mânšoa˜_to gija_kti, hu·kumât gija_kuna, ea˜ âska, hu·kumât sta ṣṭâla_viri de mânša nâ vilâastâi ča. hu·kumât gija_kuna o˜ ni ienam i˜a ni uteň suara kâa lâtri šo vřâkânaň bo vřâkânam; âmkioa˜ de šoa přenam_kti ṭüṭü přela_âsa nâ˜i â? âmki âćti mujo·idin_to kâa mâṇanta hu·kumât gija_kuna o˜ de ni ienam_kuna fâqât i˜a e nu duć, donâ tâpka gâćaň, o˜ć â·ki tâpka vřâkâti oasom mânšoa˜ tâpka ü tâřâ, kunam, âa, kuna kti, âmkio˜_to mânša, mânša kâča tâpka přenâsi? mânša de nâ přenâsi! | |
| suara mânšoa˜ giǰa_kâřastâi âkiste, âmki muǰo·idina˜ mulo, mulo šâm·sulo, lesta takrâ mulo_âsa. âska muǰo·it di_âsa. âskea giǰa_kâřastâi kâča šo lot kula_âsaň bo šo lot_kšaň; o˜ de ina lot, nâ_kula_âsam_kti ča suara, âska nuksati âćti âmu sta âaṭi meṣ âćti âgâći oaso! ina lot viri to. â·kiste âgâći âćti ča˜, â·kiste eṭa mu·ṭâr ninša ieloa˜_to vićâ puč mu·ṭâr ea gâǰâr âmkioa˜ viati sâip, ü˜_ǰeati sâip, âmki kâabo, pe târeati tâpka di puṇrik di sunti pe târea·sâ âmkioa˜. â·kiste˜ âmkioa˜, bâṭa kti ča˜, ni âćti âkiste˜ merořm oa·sâ sâip. merořm âćti sâip merořm quvâ de via to˜_to sâip â·kiste˜ ina lot pâmüč, âtaǰbâra giti âmna ṭâŋa vřâkâla mânša kâča âi? âmna dâ·ut kila řâdor lâ·ṭin pâ·šeati ninša lâsti sâip âmki âska, muǰo·idina˜ sta prugrom di nâši·so âmkioa˜; â·kiste ča˜, strak pâřučkol â·kiste si [?] o˜ de nire vü târi sta âmkioa˜, âmnoa˜ ṭi˜č nâ_âsam! âmče˜ de lot_kti suara quvâ ni gâanta! o˜ nire ni âćti strak mâṇragal ǰena·sam sâip, â·ki mâṇragal, i˜_to ni nsi to sâip ča, â·ki viati âska âźartâli tâpea·si nâ˜i â? | |
| â·küste sâip imoa ǰe âmna mânšoa˜ pâmüč, âmna kâta·gal břo de ča utinâ; imo ni utinomiš. kâta_gal břo âmki=âkiste io sta, tânsim meṣ, mulo âpźâl, de ǰeṣ_kti ča [?] suara, qumondon ˀubâidulo mi vânmati, âmki de, gek_kti ni ie sta bo. imoa ǰe âmkio˜ sta âkiste˜ nire â·ki, ina, bâřasgiro niṣo. bâdi·oa pâa_giti pâaruk u bâřasgiro nâ_âsa â? âska bokčâ to u˜. â·kü âkiste sâŋgâr i·peati ča˜, âmkio˜ sta di imo sta di âaṭi â·ki, lâṭea˜ ǰela bâ âkiste. i˜a â·kiste˜ i˜ sta muǰo·idina˜ gi☠küře˜ küře˜ ânü ǰeati de nâ buna ina lâtri břâźa niň gâati niň poar, koṭ kâřa bo ina put, peṭti, ina berkuṭ, âskarvor, kâřa bo kti ča˜, i˜a gâati nire_vik, gâṇür čamak ǰeao! âaṭi. i˜a de â·kiste dârâ e sin gu sta âmna dârâ e sin sta kâča imo sta totbřo mânša bulâ pere, šâŋir vâňi bulâ, gâṇürio bulâ, suara âmna, âmna mânša de i˜a i˜ meṣ vâsařeaâ nâ˜i â? i˜ sta ǰâbâ to âmki de âta oasâ imo de tu meṣ ǰâhot kummiš_kti. biliuk mânša sin dârâ mânša i˜ meṣ sâniâ âkiste. â·kiste i˜ sta ǰâbâ biliuk oala bo âkiste. | |
| â·kiste˜, ǰâhot â·kü kuna de [?] mi de `ča dâfâ imoa, imo sta mânšoa˜, berkuṭ âmlâ_kâřo. biliuk, sâxta sâxta=kti âmlâ_kâřâ. [end] |