imo sta ǰâhot sta ṣṭâlviri purǰik

by

Muhammad Anvar Amin

recorded and translated by

Richard F. Strand


9.  

 
The True Story of Our Jihâd

by

Muhammad Anvar Amin

recorded and translated by

Richard F. Strand


9.  

 
nuriston mânšoa˜, ǰe hu·kumâta, nüštruk, pâ·se˜ imoa ṣuč kâřa to âkiste˜, pâmüč u âska [?] lot kâřo, mânšoa˜. imo e_sâma mânša di čâlti pü târiomiš, ku sta gřom luṣi·sâ bo, ku sta, kâča âska_âsâ bo. kâča tuare˜ hu·kumâta liṣṭati bâdüšt ela_âsamiš bo. imo io pâvidařika˜ suara âmna, pâčogula˜ gřom_to ste˜ mânša pü târeaâ. püň pü târeaâ. eṭa mânša kombřom sta de pü târeaomiš. eṭa suara, kombřom ste˜ giti kâtakal poar mohâǰar bâ. ča pilŋiti giti. imo˜ ǰe kâta břoa˜ fâi·salâ_kâřo ča, ina buṭi iu to˜_to kâtakal ste˜ âve˜ nâ bânâsi nâ˜i â? imoa âmkio˜_to giǰa_kâřâ ina niň âni nire, kombřom nima dunio to, šo, čaň ste˜ ǰâhot to ni oasaň bo. buṭi, imo niň mânša šoa přemmo. ina lâtri â·küste˜ ča târi bo, â·kiste˜ čaň šo buṭi přeloň. kti imoa ǰe âmkioa˜ dâvo_kâřo ina. â·kiste sâip âmki imoa, ina dü mos, â·kü nimak, imoa kombřom nimak ṣuč_âsi. sunti imo sâip, hâr gřoma˜_to sâip, buṭi, bâtor, kilâř, ṣâřa, âṣe, âmnoa˜ âveti sâip, biliuk sâxta kti mâiâ sâip. ea˜ vâre imo to ste˜ âmnoa˜ gi☠mi hu·kumât gâana io, vř☠ŋâla bi, hu·kumâta koṭ bi bo âmnoa˜ de imo to nâ nâčoana, kti imoa âska_kâřo nâ˜i â? â·kiste˜ âmkioa˜ âveti imo biliuk lesta kti so tâřâ sâip.
â·kiste˜ ina hu·kumât imo to puṇrik xâlos biti ča ča ča lâsio âkiste˜, o˜ di, nâ bom âkiste˜ i˜a, o˜ püň gom âkiste˜, â·kiste sâip ina hu·kumât gek_kum giti ča lâsti giti sâip, kombřom pâřio! kombřom přeati ča sâip mânšoa˜ âkiste˜, mâǰbur biti sâip âmki pâta bi mânša kâča_âsâ bo âmki, kombřom mânša sâip, âmki giti, kâtakal, mohâǰar bâ âkiste. kâtakal âkiste˜ âmkioa˜ lesta âska kâtoa˜ sta viri_âsa lea kti [xx] sâip. âmki lesta kti ṭâkiâ višâlla bo sâip, tre_kâše˜ řoa sâip imo to, e vâsa_kâřo sâip. tre_kâše˜ řoa. ea vâsa kti vře˜č kâřo. puč ǰuvor, puč ǰuvor nâ_kunta_â? puč tića ǰuvor, ea go_kâřo. ea vâse muři ius; ea go_kâřo. mânšoa˜_to go, gu kâča go mâča [?] gu·si bo âmki. xo âmkioa˜ [xx] imo meṣ [xx] imoa kâa âmče˜ meṣ kâřa·si bo âskea ku˜ nâ bâiâ imo meṣ. nâ_ku˜ bâa to mânša mâǰbur bâ ne?
âkiste˜ âmki, âska źâ˜vora [?] sâip, kür luṣṭati düš luṣṭati sâip, čare, fâur bâdo târti sâip, mânša giti, c̣ânrol [xx]. źâ˜vor. ou˜. i·a tâklifa ča˜, hec, di nâ dunio to tårix to i·a gita sta, tâklif mânšoa˜_to ḍu bi·sa! nâ gita sta mohâǰarât mânšoa˜ kâřa·sa. nâ i·a tâklifa kâča qâbul kunta_o. mřela bi bo di kâča qâbul nâ_kunta mâgâr âmki imo mânšoa˜ qâbul kâřo i·a lâtri! biliuk tâklif so [?] târiâ, bâdo. biliuk mânšoa˜_to düš luṣa˜_guâ, kür luṣa˜_guâ, pârmaň mâřâ sâip, pâši_âtam mâřâ sâip, ǰukuř mâřâ sâip pâput u sâip. purduk mâřâ sâip. go_ṣâřa sâip pâ·kât vâvići xâdâm [?] dâdü vići xâdâm_to sâip go_ṣâřa sâip kṭol u [xx] gu·sa, mâřâ. mâřa sta kâča âmkioa˜ âlol kti â·kü âṭleaâ, âṭloanâsi. âmki, ânobâṭa [xx] kâča nâ ŋânâsi! kâča ča˜, pṭipâara, iâio přoala kâča pâput u, âmkioa˜ vř☠kṣeati kuiu ko pâča˜ bâti iunâsi bo pâčanâsi nâabo suara â·kü âsi. i·ea, mânšoa˜ ŋe pâput iâš, hâr [?] to˜_to tâior_âsi. [laugh] i·a gita sta šâ·kal tâklif meṣ sâip imo sta mânšoa˜, mohâǰarât kâřo.
xo, i·a, mohâǰarât de, i˜a nüške˜ di vilâioš ina ṣâŋe, kâmkuřoa˜ sta mohâǰarât di vilâioš [?] nâ˜i â? biliuk tâklif meṣ suara gřom luṣiâ; bâźgal; uštroṭ; pitikal; kâmu; merořm; âmna sunti luṣiâ sâip. [xx] to mânša püma_guâ, püma gu to, eṭa de ča_pilŋiri go; eṭa pü_pilŋiti gomiš o! dü bâṭa bomiš mânša.
dü bâṭa bimiš to âmna `ča târloa˜ de, ṣṭâlea˜ ni âćti quvâ kombřom ni_ṭiki·si, mumořma ǰâbâ vânmati ni âćti kombřom, âtam oaźti, ṣuč kunâsi. âgâći poar, pṭipâar poar âta, âgâći, â·ki âtam oaźanâsi merořm, niň, sâret niṣo, toa, i·âar, bâdo târti ina, pere, pere u do nâ_âsa_â? pere u do to bâdo târti giti sâip merořm bâkul bâra_âćti ṣuč kunâsi âaṭi. â·kiste˜ âćti sâip sâret bâdo bâra_âćti sâip, ṣuč kunâsi. pâput ninša ieloa˜ vianâsi âmki mânša. imo pü târi mânšoa˜ sâip, âćti sâip, âkiste˜, nire, ina lâmaroṭ poar, ni âćti sâip, pe târti ina pere bâdi·oa peň poar nâ_âsa_â? â·kü ninša sâip, čare mânrakal ninša sâip čare â·ki [xx], âmnoa˜_to, ṣuč kunâsamiš. âska nüštruk źâ˜vor. âska âvâl imoa, ina, ṣuč ubaǰea źâ˜vor.
â·kiste ina, âska gek kum giti âmki giti giti [?] ča_ṭiki to sâip, ča˜ mânšoa˜ âkiste˜ mohâǰarât_kti sâip, âmki čaň sta de čaň pâta bo; püň sta püň pâta bomiš o! imoa püň âsia˜ sâip, o˜ć â·kiste˜, püň ste vâlleati, âni bâra_oasom nâ˜i â? o˜ć âni bâra oasam_to sâip âmki hu·kumâta ṭi˜č bo ča âska âni imo ketta biliuk tâḥrik kula mânša_âsi bo âska de âni nâ_âsa. suara ea dü kâča mânša âi bo de âmkioa˜ imo pâtioammo višiâlla_â? suara, nâabo de i˜_to lesta tâk â tâk â mânša_âsi â·ki ulâmo âsi suara, čizi ǰeṣ mi ǰeṣ di_âsi mâgâr, i˜a dü mos â·ki ǰâbâ to_âsia˜ sâip, âmki, lâder nâma˜ nâ dreaâ. nâ ˀuzar ku˜ dreaâ nâ kua vidařoa˜ dreaâ nâ kâi, qâttân âmkio˜ sta ǰârgâ tuare˜ nâ oasâ. ânvâr gu·sa kti âmkioa˜ ṣu bi to sâip ča˜ e vor âkiste˜, ǰârgâ sâip âmkioa˜, qâtor kâřâ sâip. kobul ste˜ di mânša vâlleati, âmki mânša, i˜ sta de qotri [?] âska_âsi. kâča ǰârgâ âćla mânša, vâ [?] âćti giṭa sta bulo, âska giṭti, di â·ki nâ utea sta bulo âska hu·kumât to. i˜ sta ina fi·kar_âsi.
gek düŋe âmki â·kiste˜ â·ki ni gu to čuk imoa, lea źâňala mânša_âsi bo de âmki âkiste hu·kumât to lea vor emmiš_kti imo sta viria vilânâsi. âmna puṇrik nâ vo âi; tâpka nâ vo âi; nâ â·ki čan_âsa nâ âmeri·ko_âsa šo gi☠vidaři·saň kti. nâabo âska hu·kumât biliuk vidaři·si âska [xx]. sâxta kti âska, âska ǰak ṭurân o˜ vilâ·sim! i·e to âkiste sâip â·kü čare ...
[R] ketta ǰak ṭurân.
[A] âska, e pâǧmâni ǰak turân_âsi âbdurâmon nom_âsi. nire, sârhâdor_âsi. berkuṭ. âska i˜a nire â·ki, mânragal ṣuč to sâip, pe teti viati sâip â·ki i˜a âska, šü˜ vo vânmati ve târeao. âska purǰik de i˜a kâři tu to. âska sâip â·kiste˜, âmna čaň mânšoa˜_to ǰârgâ šuru_kâřa to sâip, ǰârgâ pâmüč â·kiste, eṭa mânšoa˜ sâip, biimoni kti sâip, ṭâŋa vřâkâti, ina lâtri qâbul kâřâlla. koma˜. koma˜ di âi, kâta di âi. pâare kṣto di âi. tre qi·sam mânšoa˜ sâip â·ki čütke˜ lâder, pâare kṣtořm sta mânšoa˜ vâňati nâ˜i â? mânša âmki kâta, kâtakal sta di giti kṣtořm gustâi; kombřom sta di âćti â·ki oastâi; mumořm ste. ǰâbâ mumořm_âsa nâ˜i â? muǰâ·idina˜ sta ǰâbâ de mumořm_âsa; suaroa˜ sta kombřom_âsa. â·kiste sâip â·ki, ǰârgâ ninša giti sâip kâča kobul ste mânšoa˜ vâlleati sâip, âmki ǰârgâ ninša giti, mânša pâido_kâřâlla âmkioa˜ nâ˜i â?
[R] kâča?
[A] mânša pâido_kâřa sta, vilâlom! ne. âmkioa˜, nâ vilâti de kâa di bulom âmkioa˜ tårixi guno_kâřa·sa, suara âska vel to i·a mulo âpzâl â·ki vel to mi dâvo_kunâsi ča o˜ć âni, bâraň, âmna mânšoa˜, âmir, nom_tâřa·sam_kti. âska, i·a dâvo vo_âsi nâ˜i â? âu, i·a ˀubâidulo nom vo nâ_âsa_â? e xurzåbit_âsi, âska qumândon_kâřa·si âmna kâtoa˜. âmnoa˜ sta ina ǰeṣvor pâküř sâip, e ča mânša kṣto âi kâča âi bo. e ča moč kombřom sta âi, e ča moč kâtakal sta âi. âmnoa˜, âni ina, lâtri to nom_tenam bo de ina, e tårixi xiǰolât_âsa âmkio˜ düŋe, mum·kin âmkioa˜ nâ źâňati ina kudüm_kâřa·sala. nom de nâ telom; mâgâr âmki mânša âkiste˜ sunti kâmkuř źâňanta âmkioa˜.
âmki mânšoa˜ sâip â·ki sâtić lâk ṭâŋa vřâkuta·sâ. âmkioa˜ sâtić lâk ṭânoa˜ vřâkâti ča ǰârgâ biti ča, hu·kumât, biqâid i šâk ni ienam_kuna suara, lot_kti, kti giti pâtioanta mânšoa˜ nâ˜i â?
hu·kumât de xut [xx], imoa, biliuk kudüm_kâřa·si niň. imo bâraň giti âmki ṣeć moč âmki ǰeṣṭ, nâmi stoa˜ ǰe, i˜a ǰe, âmki, i·a šo voli e imo bâra gu·samiš nâ˜i â? imo bâre nire pâriṣ sta ǰeṣ mi ǰeṣ vâlleati dâŋgom bâkul sta mânša vâlleati sâip, âṣṭić mânšoa˜ meṣ i˜a pere mârdon quron_kâřo sâip, e muṣala mâti, i˜a âmki vâlleati â·ki âska_kâřâ sâip. âmkio˜_to i˜a giǰa_kâřâ ina ˀi·slom sta ṣuč_âsa; šo dâlke˜ gâǰâr, šârmoa˜ ieloň; šo ina lâtri to imo sta puštivoni kšaň kti âmkio˜_to giǰa_kâřa to sâip, âmki mânšoa˜ i˜ sta viri ŋuto sâip â·ki. âmki giti giǰa_ku imo strak dâfâ giti â·ki, ina hâmlâ kummiš ina hu·kumât to. imo puṇrik nâ vo_âsamiš kti giǰa_ku. i˜a âćti âni, âska vel to ina muǰâdidi âni pâido bi·si. ina muǰâdidi to sâip, â·ki tâqribân, ṣu_âźora [?] donâ de puṇrik vřâkutâ; dü vićâ duć donâ bâm sâip âni âtre dârâ, ṭâŋa přeti sâip mukeati [?] sâip, âmki oakuṇi i˜a ruqsât kâřâ. šo giti pâpali☠ieň â·ki. niň poar. i˜a gek düŋe pâpali☠âšiâ âmki niň poar, âmki niň pâpaliâ˜_gu bo âni niň poar šaṭe˜ mânša âi. sâlorzi [?] âi mumânḍ âi kâča kâča mâmund âi nâ˜i â? âmna pâpaliâ˜_gu bo čaň ste ečok břâźa nima âćlo kti. âni ina břâźa niň poar pâta bulo kti sâip, âmki i˜a âska_kâřâ.
âmki ǰârgâa˜ pâmüč âmki eṭa fâistâlâp [?] kunâsi â·ki suara, dâŋgom sta e mâlak_âsa âska [?] i˜_to giǰa_ku, imo pâmüč ina ǰârgâ to e xâlqi di_âsi ina xâlqia kâa_kummo kti giǰa_ku. ina imo sta viria˜ â·ki gâana kti giǰa_ku. i˜a giǰa_kâřo i·a xâlqia de âve kti giǰa_kâřâ, i·ea imo meṣ quron_kâroammo kti giǰa_kâřâ. âska de quron_kâřa stea, âmki, quron_kâřa bo de i·a viria de â·ki gâana ča. o˜ de gâale to kušol_âsam, [?] âmki de viri nâ bâra iele to kušol_âsi nâ˜i â? o˜ć ina viri bâřa bo [xx] kušol_âsim ča âska â·ki quron_kâřo kti i·a hu·kumât vilâa bo! i·a ina âmu sta quvâ čaň ste nuksoana âni niň poar i˜_to, tâklif buna višti sâip, i˜a âska xâlqi di vâlleao âkiste. xâlqia de quron_kâreati sâip âmki ṣeć mânšoa˜ i˜ meṣ quron_kâřo sâip. imo giti strak dâfâ imo sta qom u teati, pâpali☠iemmiš.
âmkioa˜ de, lå hârâ·kât nâ_kâřa·sa ča ina mâmâd zârin, nâ_âsa_â? strak e mâmâd zârin_kunta âni e, qumândon_âsa. e ma·šuâṇi. ina ma·šuâṇi vâ·kil, kiloa˜ sta âska ǰârgâ meṣ sâip, pârea, ina subhâ sârhât âni, âmna, sârhâda˜_to pilŋi·so âska. o˜ć, šo sta si·po·i_âsam ina lâtri to, šo meṣ bunam_kti. âskea â·kiste˜, âtre â·ki mâior e to˜ u, âgař nâmoč to vâsaŋaňati sâip, vâ·kil â·ki u tiati vilâa·sa "ea, oakuṇia˜_so. imo, ṣâŋe šoa liṣṭati musalmon_kâřomiš. âgâr ina imo musalmon biti ḍâkara bi·sa bo kâa de ina quron, imo sta küře˜_âsa bo de. imo sta, šo ine to imso kšaň ča˜ ina imo sta nâ_âsa kti. nâ˜i ina imo ǰe šo sta lâṭea˜ ea quron_âsa bo, ina quron sta duš·mân oa·sa bo, suara ina lâtri to šo vâňoaň imo to ina lâtri to, pâṣuč âćaň_kâřa to, moamât zârin nom vo mânšea u_kâćeati puč por tâpka bâru_kâřastâi. oakuṇi čor vo âi. uň_kâćeati puč por tâpka bâru teti ina kudüm_to ea o˜ć_âsam_kti u tina·sa âkiste.
â·kiste âskea sâip tre što puč mânšoa˜ meṣ giti, pâriṣ âtam oaźti sâip e dü tre de âskâr ǰâňiâ âskea; e dü tre tâpkoa˜ vř☠ŋâti oaso. â·küste âmna oakuṇia˜ de tâpka ǰe lâtri vâňi bo, â·ki io sta šü˜ de šâ·it kunta sâip ča! â·kiste âmna nuristonia˜_to biliuk lâtri, bâdüš gustâi, âmnoa˜ tâpka vř☠ŋuta·stâi hu·kumât to. ina hu·kumât nâ droala mi višik, bunta, višiâ nâ˜i â? â·sli ina_âsi ča â·ki źâra vřâkâna ne. â·kiste sâip âmki mânšoa˜ u tiati sâip giti, ina, niň poar ina, gâṭvâṭi ubaǰeaâ nâ˜i â?
gâṭvâṭi ubaǰea to hu·kumât to sâudo [?] pâido bo ina lâtri. ina lâtri, ina imoa, ina gestuk, kombřom ča_ṭikaň vik âkiste˜ âskea â·ki ǰå·sus di pâido_kâřâ nâ˜i â? ǰârgâ ča ni nâmti ča nâmti mânša pâido bâ [?]. lâtri ptâ. âskea ṭi˜č bo ča "oho, âni de nâ čan_âsa nâ de âmeri·ko_âsa nâ de kâča âi. sirf âni âska ea mânša âi ina egek, imo vidařea·samiš. o˜ć â·kiste˜ dâm bâ dâm â·ki pâṭia˜ di přenâsim ča, šo pe utela nâ_âsamiš imo to, dunio sta, pârea musalmon imo meṣ vâri_âi. vâlâkâ šo pe utelom bo tâslim nâ biň bo, ina hu·kumât, ina ea mos to âtaň âtaň ine, ni gâati ǰâllobot vâsaŋařoammiš_kti âmki tâbliǧot kunâsi imo, mânšoa˜_to di.
o âmna lâtria˜_to sâip âska vidaři sta bâlla bo sâip â·kiste˜ drea ča âćti imo sta tuare˜ ste˜ hol vâňati ča âkiste quvâ nuksoa ste to, bo nâ˜i â? quvâ nuksoa to˜_to ča˜ â·kiste˜ pâmüč u âkiste˜ o˜ přeati sâip, nire i˜a [xx] âźartâli de ṭâbeao_â? utro ina kâia˜ de o˜š nâ_kunâso kti âkiste ečok di vidařa sta bo âmkioa˜ i˜_to sâip. ina âmu mânšoa˜ di vianâso suaroa˜ di vianâso di uto. egek to sâip, âskea ina [?] lot pânoma sâip âki, âmna mumořm i˜ sta ǧi·åbât to, i˜a âni pi·šâvur_âsia˜; â·ki mânša pâido kti; lot kunta_o! strak. âska lot viri to o˜ć âni âmki dü mânšoa˜ âni vilâiom nâ [xx] âmki puli·sa [?] vâlleati. âmki mânšoa˜ vilâim_to â·ki mânša lot kunta kti o˜ć âta gom. âta giti pü enam bo lot sâ·i kâřa·so mânšoa˜. lot kâa_kâřa·so âmna gita sta âmna gü kṭol muloa˜ sâip, nâ źâňati, âmče˜ sta nâ źâňa˜ vor to, pâmüč eṭa, gü kṭola˜, io sta kṭol štâňa, mânšoa˜ sâip, pâpali☠giti sâip, âska hu·kumât to ṭâŋa vřâkâti, i·a hu·kumâta, ni utemmiš_kti ča, lot_kti âska_kâřa·so. i˜a âmki mânšoa˜_to giǰa_kâřâ âkiste˜. i·a ǰârgâ âćla mânšoa˜_to imoa de lot kâřa·sa tü kea, nâšanša inea, imo sta lot nâ nâšu. i˜_to ˀusar kunâsi. i˜a giǰa_kâřâ utraǰaa˜_so! šo lot kâa kti_kâřa·sa. tre mos pânüškuň de šoa, ina kâ·para_âsi. mulhet_âsa, kâmunisam_âsa_kunâsaň. ina tre mos_pṭipâar šo to ketta pegâmbâr giǰa_kuna strak ča, ine meṣ lot_kšaň, ṣuč ča [?], râvo nâ_âsa kti. šo to âgâr kua, hu·kum_kâřa·sa bo, âska pâigâmbâr sta nom_teň kti giǰa_kâřâi [?]. imo sta din_to de pâigâmbâr åxir zâmon xâlos bi·sa. di vâre pâigâmbâr âćla nâ_âi. ea˜ šo to de strak e vâre pâigâmbâr oa·sa âni šo to ina lot ku sta bi·sa bo. čare sâret niṣo pâsü u sâip, e vor âmna mânšoa˜ bâra gâati, o˜ bâra kti pe nâmanam â? pâṣuč. nâ pe višinta sâip. dućći mânšoa˜ bâra gâanam, di mukanta i˜_to, dućći di bâra gâanam di mukanta. åxer i˜a giǰa_kâřâ o˜ hu·kumât meṣ lot kunam kti giǰa_kâřâ. ina ǰâhot to de mânša muki bo pṭipâar kor puṇrik přâpti bo âska luṣa sta, â, sâṭa sta nâ_âsa. šo de âni bâra giti pâsü bâra_ṭikanaň [?], e mânša di mukanaň, di pâsü bâra_ṭikanaň [?], di püs bunaň o˜ć ina giǰa bo hu·kumât meṣ kunam i˜ sta bâksea_âveň kti o˜ pâṭi stroanam hu·kumât to. imoa xâto bi·samiš; mânšoa˜ mišea·samiš; imoa bâkču_kunam. [xx] tre muloa˜ sâip, ea mulo šar gul kunâsi přâsü˜. ea mulo âbdal hâi. ea, čare šüdgül e mulo_âsi, xudâa bâkčalo drea šâ·it bo. mulo hu·sen_kunâsi. âmnoa˜ trea˜ nubât to pâňu_giti viri vâllâiâ suara, ketta mânša ina dâḥri hu·kumât meṣ viri vâllâ bo, âska ǰâňa sta mubohâdâm_âsa. âska râvo_âsa kti giǰa_ku. â·ki de âmki muloa˜ gita sta viri vâllâiâ nâ˜i â? [xx] meṣ vâllâiâ [?] kti giǰa_ku. e˜ strak âska ketta, dü buli, šo to âska pâigâmbâr ketta oa·sa kti giǰa_kâřâ. strak âska [xx] šo to åxeri pâigâmbâr âćla ketta_âsa. âske sta nom vilâň_kunâi [?]. ou˜. ketta âiot âvaři·sa âskea uň [xx] üň, ko âskoa vilaň. kâřa to [?] âmki hâiron bâ âkiste. kâa mâṇanša, [xx] imo tu to viri kudoaň oa·samiš_kti giǰa_ku. egek to u, mulo âbdal hâi u tiati sâip, tubo_kâřo sâip. uštroṭ nâmoč âmo to. ou˜. kârmaṭia˜_to vânmati tubo_kâřo. âmkioa˜ tubo_kâřa to sâip â·kiste ina, lot sta mâ·sâlâ to, i˜a, tâxir kor bo ina lot kâa šâ·kal to bi·sa kti nâ˜i â? âmki ǰârgâ_to i˜a âkiste giǰa_kâřâ suara, ina lot kâa kti bi·sa kti giǰa_kâřâ i˜a. imoa de dü mânšoa˜ lot nâ_âsa ča˜, e dü mânša âmkioa˜ lot kâroalâ. čütke˜ gâati e pur âmo to âta ǰeati lot kâroalâ! âfǧoniston ǰe nuristona ṣuč_âsi. âu, pâpućći [xx] to imo ǰe, âske sta ǰâbâ_âsi. noša totša_kârek giti ḍâkara viri i·âar [?] enâsamiš. tü urus pütras, imo_kunâsamiš; tü âŋlisa˜_kuř, imo, to âmki_kunâsi! ina strak šoa lot kâřa·sa, šo nâṭü bi·siň â? nâ˜i âska hu·kumât nâṭü bi·sa_â. ina lot viri šo to kettoa˜ peš·ni·ot kâřa·si šo kâřo nâ˜i. hu·kumâta_kâřâ. o˜_kša âa? o˜ šo to giǰa_kunam, ča šo eṭa mânšoa˜ c̣âa vřâkutastâi; c̣âa vřâkâti ina hu·kumât meṣ lot kâřa·sa. šo čütke˜, qoum meṣ xi·ânât kâřa·sa, din meṣ xi·ânât kâřa·sa. din meṣ xi·ânât kâřa·sa bo, ˀi·slom meṣ xi·onât kâřa·sa, kti giǰa_kâřâ, âmkio˜_to. âgâr šo giǰa_kunaň bo suara imoa lot kâřa·sa_kunaň bo; bes lot sta pâṭia˜ i˜a gâćaň; lot o˜ć o˜š kulom, šo lot kâřa sta bi bo âske to o˜ di imso_kulom! âska sâ·i_âsa bo. ea, hâiron bâ âmki. lot sta pâṭi nâ vo_âsâ âmki. i˜a giǰa_kâřâ lot gek_kti buna, dü dü âar, dü hu·kumâta˜ sta bomrik ṣuč_âsa ina. nuriston ǰe âfǧonistona ṣuč_âsa! źâbâ molum âi. â? qumândon molum âi. muǰåhidin mâlum âi saňi âske to di molum âi imo sta di molum âi. xu pâs, e âar sta, zarur nâṭü bi·samiš. ioa, eṭa mânšoa˜ âćti imo to, pâmüč, lâder oastâi. vâre_mumlâ·kât to sta mânša. âgâr âske sta mânšoa˜ sâipa [?] de âmki imo sta duš·mân âi. hâ? duš·mân lâder nâ iela bunta ea duš·mân ea to! zarur, šo to kâča lâder oastâi bo vâra_mumlâ·kât to po·kiston ste˜, hinduston ste˜, urusâ ste˜! kâča lâder oastâi bo de âmkioa˜ sta noma˜ gâćaň! â·kiste˜ šo ǰeti, šo poar ste˜ hâiât mânša kâča_âsi? ǰârgâ mânša. âske sta mânša kâča_âsi. â·kiste˜ ketta ketta viri â·ki bâhâs bâ. ketta viri meṣ šo ina lot peṭio. gâćaň sânâta˜_kâřa to sânât nâ_âsa. i˜a giǰa_kâřo o˜š_kša_âa? šo štâňa_âsaň kti giǰa_kâřo. viri nâ vo bâ âkiste˜ i˜_to sâip. o i·e to sâip ča â·kiste˜ âmki i˜a vânmi to âmki giǰa_ku, tü de, nire čaň buloš imo čare niň bummo kti sâip, ča giti hu·kumâta ni_âveti sâip, âmki mânšoa˜ hu·kumât ni târeao! i˜a âmna mânša, ina tårix to, dâlke˜ gâǰâr ˀi·slomi hu·kumât de strak bâxâir, i·poa˜_go. ine to âmna mânša, mâshul âi, âu, ketta mânša hu·kumât to oasa bo, o˜ šü˜ vo bim bo de o˜ i˜ čat to mi kudoanam. âmna mânša âmna mânša küt koř bulâ âkiste. o˜ nâavo [?] mâřam bo, zarur âmki hu·kumât ina lâtri, küt kulâ ča, âmna xi·onât kula mânša, âmna c̣âa vřâkâla mânša; âmna qoum_to, tâbo·i âvela mânša kâča âi, âmna mânša, âmče˜ sta sâzo to přâvoa sta bulâ.
â·kiste˜ ina viri to i˜a ina, sunti viri mulo âpźâl to, âṭleao. mulo âpźâl to i˜a giǰa_kâřo, tü de mulo_âsaš. ina lot ǰohis_âsa_â? šâriât to, ǰohis_âsa_â? ina xudâia nâ mâṇla mânše meṣ lot koř_âsa_â? kunam bo nâ˜i kti giǰa_ku. e˜ nâ_âsa bo tua lot kea kâřo_kunam bo, "kombřom mânša, püpü lâsiâ suara imo sta, gul âša sta nâ buna imo oatea˜ mřemmiš_kti, âmki i˜_to pâpaliâ˜, vâpali☠âćnâsi, âmki i˜_to vâpali☠âćanta kti i˜a, lot kâřo kti giǰa_ku. bes tu sta ina lot, kâřa ste to qo·il_â·ša_â?_kâřa to, "o˜ de nâ_kunâsim âmkioa˜ kâřo kti giǰa_ku. i˜a giǰa_kâřo tü de mer_âsaš. tü de strak di kti mer vor to oa·ša. o˜ć âmir_âsa_kunâsaš. ina mâ·suliât sunti tu to_âsa. muǰo·idin giǰa mi_kula bi, i˜_to tâklif vo_âsa kti ea mânša muka˜ de mukana. â? âmki imo to tâklif_âsa kti püpü mi_kula bi. tü de musalmon di_âsaš, mulo di_âsaš, âmir di_âsaš ǰeṣ di_âsaš. tua kâa kti ina lot qâbul kâřo. kâřa to âska di ǰâvop nâ vo. ǧâlât bi·samiš. mâgâr ǧâlât bi·sam_kti âska âmu sta ǧâlâti meṣ ǰena to de `di bulâsi [?] sâip. âska âmu sta šâitoni feal tå âxret to vik âskea [?] so tâřo. kobul ste˜ sârvâr oasa to `di âta utařo âkiste˜ âskea.
âni eṭa tâbâqâ mulo ketta_âi bo âmna pâ·kât kṭol kârea bo âmče˜ ǰukuřoa˜ e [?] âmu sta [xx]. i˜ sta muloa˜ meṣ kâla gek düŋe_âsa, nâabo o˜ musalmon_âsam. o˜ musalmon_âsam o˜ biliuk lesta musalmon_âsam. sua˜_to lâtri di i˜a biliuk mâsrâf kâřâ sâip xudâa sta râzo düŋe; ṣuč di i˜a biliuk kâřa·sa; puṇrik di i˜a biliuk mâsrâf kâřastâi; gâtra de o˜ biliuk bi·sam. mâgâr âmkio˜_to kâa fârq_âsa, e dâři oala bâru teti tâzbia˜ vânmati sâip mânšoa˜ pâtioanta! mânšoa˜_to mřâšta nâ_âsa, mânša ina tâmisa ku˜ nâ bânta! âmki giǰa višanta âmna firištâ âi âmna mâlâkâ âi višanta. hol ina_âsa âmki, ina, pe_kâćti de mânša âi, musalmon âi. âmki pok, šâiton âi. musalmon nâ_âi. [xx] xudâa pâtiala_âsa_â? ča âmki pâtioanta. zohire kudüm kunta; pṭipâar vâra=kudüm_kunta. ina lot de âmna mânšoa˜, gita sta ǧâlâti meṣ kâřa·sa.
ina lot to ča â·kiste˜, âźartâli ṭâpoa˜_go. âźartâli ṭâpoa˜_gu to ča âkiste˜, i˜a ǰe qoum pâmüč, bitifoq ča [?] oaso. âmki giǰa_ku imo lot kâřa·si i·ea lot peṭi·sa, i·a imo sta duš·mân_âsa âmki ča utiala giǰa_ku; šo imo to nâ kudeaou˜ ina suara hu·kumât to tâslim bi·saň šo suara šoa ǰâňa sta râvo_âsaň. suara i˜a ǰe šoa bulo kti, i˜a, âska_koř bo sâip.
âmki ča utinâ sâip. i˜a giǰa_kâřâ šo ča utiaň o˜ duš·mâna pe utela nâ_âsam, šoa lot kâřa sta bo kti sâip. vićâ duć âaṭi meṣ giti târti kuṇ gom sâip. kuṇ hu·kumât bâři·sa [?] âska vel to sâip mânša! vićâ duć mânšoa˜ meṣ o˜ â·ki kâa_ku˜ bânam. i˜a kâa čâl kâřo sâip. ni_giti u_giti kuṇ pâkṭle bâdo pâřim_to sâip â·kiste˜ âmki âaṭi tre to bâṭa_kâřâ sâip. duć de kuṇ bâdo, bâkul âtaň, bâku, čare niň âćaň kti giǰa_kâřâ. duć moč. duć moč bâre pâšaŋar âtruk u pânoř, nâ_âsa_â? â·kü pânoř â·kü üm dâiâ. bâdo ste. šo bâre âta_âćaň [?]_kâřâ. šo gek_kti dâdü iâionâřik biti suara, âta_âćaň. âmna mânša purǰalâ ča, âni, biliuk mânša oastâi kti. o˜ć e nu duća˜ meṣ sâip, â·kü ṣṭâle˜ ü_giti břâkom bâra nsala bom âkiste˜. e pâṭi streati nâmiâ suara i˜ meṣ puč sât moč muǰo·id oastâi; suara dü_ṣâřa goa˜ ǰâňati buṭi tâior kšaň kti. e pâṭi streati břâkom nâmio kuṇ.
âmkioa˜ o˜š kunam bo bâre, dü_ṣâřa go, goa˜ ǰâňati sâip, ǰuṣ kummiš kti_âsâ sâip âkiste. â·kiste˜ pânoř bâra nsiom â·kiste muǰo·idin kor âi? kti i˜a giǰa_kâřâ muǰo·idin kâča âni čare pânoř poar, ni âćanta kâča bâre_âta_âćanta. âmki pâřuč_vik, čuk âćla_âsala bo, ea_âźor âćnâlla_â? čuk_âćnâlla bo. tre što puč sât mânša de i˜a meṣ oastâi kti giǰa_kâřâ; suara âćanta kti giǰa_ku. âska â·kiste˜ âska řâdor bâra_giti bâre vilâiâlla â·kiste. âloqâdor puč âźor mânšoa˜ meṣ oa·sa âtre âćti kuṇ ǰeno. âmkio˜_to bâre vidařik ča lâsio [?].
âskea pe ute sâip. âkiste˜ i˜a kuṇ přeati sâip âkiste˜ âmki čaň mânšoa˜ düŋe `di pâṭi ča pto? [?] nâ tino i˜a [?]. ni âćaň ina hu·kumât meṣ ṣuč_kšaň âgâr nâ_kunaň bo â·kiste˜ šo meṣ di kunam_kti.
âmki vos_âsi sâip ča â·kiste ina, mâ·sut nâ_âsa_â? ina strak pân·šar qumândon. ina, âni, pi·šâvur ste˜ sâip mulo, ustoz râbonia, e pâṭi přeti nâmi·so i˜ düŋe sâip. i˜a âska râboni âni vâňi sta bo nâ˜i â? ṣâŋe? ina i˜a â·ki tu to nâmio, ina â·ki ča vos tu meṣ ina, ṣuča o˜š kulo ṣuč to řâmbulo kti, pâṭi přeti nâmi·so âska. i˜ meṣ â·ki e dü vići vos de â·ki, â·ki bo ina, pâṣuč to ninša oaźio. i·a mâ·sut i˜ sta_âsi âmkio˜ pâmüč lâder bo âkiste˜. ou˜.
i˜_to i·a mâ·sut âćti i·a biliuk kšüla_âaṭi i˜_to ṭüṭü pto, tü, âmki tu pursta sunti, erâŋ sta muǰohit, bu˜ nâ bânta. in·son tâfâ·ut, vo âi. eṭa vidařala bunta eṭa nâ vidařala bunta, eṭa kšüla bunta, eṭa čâṭa bunta. âmki mânša ina viria nâ źâňanta, tü âmkio˜_to koṭe˜ koṭe˜ vâllâiš bo âmki vidařati tu to tuare˜ nâ âćanta, tü âmkio˜_to čala viri vâllâ kti giǰa_ku. tua, pâṭi stroala bi bo âska mulo, âmna muloa˜, o˜ muloa˜ düŋe biliuk ḍâkara kti stroanâsim. šo mulo, din vře˜č kula šo gita sta, šo hu·kumât meṣ, kâ·pare meṣ vâllâla kti pâṭi stroanâsim nâ˜i â? tua â·ki tua pâṭi ča pta·sa o˜ vâňio_kulom [?] âmki tu to tuare˜ nâ âćanta kti giǰa_ku. tü eṭa čala čala pâṭia˜ streati gâć o˜ć âmkioa˜ giti ârizo [?] kti âvelom_kti sâip. dü vor pâṭi vřâkâti kuṇ ste sâip âska ča go sâip. âskea ča giti evor što sât mânša, âkiste˜ i˜a düŋe âvařâ âkiste. čala viri pâṭi streati ča pta to âkiste oasâ âkiste.
kuṇ oasa to muǰo·idin âkiste˜ âmki, imo sta mânša de nâ mi oasta_âsi sâip, i˜a â·kiste pâṭi streati nire nire â·ki dâŋgom bâkul vik, pâṭi streati âmna sunti bâkul ninša mânša vâlleo! âmna niň mânšoa˜ de âkiste âska, âmče˜ i·a lâǰori ča gu sta âske to pi·šâmon bâ âkiste. vidařiâ âmki, ina utro nuristoni bo [?] de ina mânša nâ dreao; âmna nuristoni âni ni âćti strak imoa čur kunta kti sâip evor âmkioa˜, âmkio˜_to tu ptri [?] ča lâsio sâip. sunti oasâ sâip. ketta mânša i˜a nom_târa sta_âsi bo, âmki sâip âćti â·kü kuṇ, vâsaŋařastâi. dü tre_ṣâřa go ǰâňati sâip â·ki_âmki dü tre vos vâseati sâip âkiste i˜a, âmkio˜ meṣ, e mohâidâ imso_kâřo. ketta mânša suara imo to ča oastâi bo, kua ǰâňi·samiš bo luṣi·samiš bo âmki âfâ_kâřâ i˜a kti giǰa_ku. kâča di šo meṣ nâ ˀi·sop vo âi nâ kitop vo âi nâ kâča kâa vo âi o. ea šârta i˜a šo meṣ âsa ča šo fâqât sâno kti imo meṣ lâṭea˜, ina hu·kumât to pâpalia˜ guň bo. pâpalia˜ nâ iela mânša kâča bi bo âska mânša o˜ć âz bâin gâanam. kti âmki pâṭi přeti sâip, hâr gřoma˜ düŋe sâip, pâṭi přeti šo âfâ_kâřa·saň kti, fârmon přeti nâmiâ sâip âkiste.
â·kiste˜ i˜a giǰa_kâřo o˜ć, čare ste muǰo·idin ni oasa bo, o˜ć â·kiste, sin dârâ to âćlom_kti ča. vâdâ přeti ča âmki ni nâmiâ! ni nâmti sâip â·kiste strak sin dârâ to gum bo âmki i˜_to giǰa_kunta âmkioa˜ i˜_to giǰa_kunâsi, tü ni âć, â·ki tü imo sta ǰeṣ buloš, â·ki imo ṣuč, tü kâroaloš. imo nâabo io pâmüč viri nâ ŋâti imo ṣuč nâ_kummiš. ina ev ev âčea˜ ššeati. tü ni oa·ša bo ina buna_kunâsi i˜a giǰa_kâřâ o˜ć â·ki de, ni âćti o˜ šo meṣ bu˜ nâ bânam biliuk vos. i˜ sta pârmaň čâlti gustâi püre â·ki âi; o˜ć â·ki čaň, â·ki niň düŋe mânša vo_âsam. kti giǰa_kâřâ. kâča_âsa kti giǰa_ku ǧosi xon imo sta břo â·ki niň, âsa šo meṣ; âska â·ki šo meṣ gul di šârik vo_âsa, âskea_â·ki vâlloalom âska šo meṣ bulo.
pâṭi ča přeti sâip, dü vići_vos o˜ kuṇ bom o sâip. âmna mânšoa˜ nâ ni višti. i˜ čat to âmki vićâ duć âaṭia˜ meṣ. âmki oakuṇi vâlleati vidařeati âmkioa˜ âni nâmti ča âmkio˜ poar sta de i˜a, xåtar ǰâm bom; âmki i˜_to nâ liṣṭanta kti nâ˜i â?
âmki oakuṇi oasa to kâa_kâřâ i˜a âmki i˜ sta âaṭi. âmki hâr kṣtuka˜_to sâip dâdü mânša tâpkoa˜ u_kâćeati ǰena sâip â·kiste˜, suara de sunti â·ki ǰâbâ to ṣuč to nâmistâi âmna, âni, âmniât düŋe nâčeastâi kti. âmki giǰa višiâ [?] utro ṣṭâle˜ ine meṣ puč âźor mânša âi âni. âr kṣtuka˜_to âmki e tâpka vo âi bâ? giǰa višiâ ča ina źâŋgâl to âi ne. ine sta mânša. âta biti buň_kâřastâi i˜a âmna bâmbori_kunta âmna hu·kumât nâabo suara, muǰo·idin sunti, pâpor [?] kâřü gustâa kti giǰa_kâřâ i˜a [?]. âmki gek_kti vidařeaâ.
bil åxeri mâ·suta ča giti âmki mânša ni âvařa to, â·kiste ča, ǧosi břok di oaso. ni giti, gâṇür gomiš âip. gâṇür giti gâṇür ste˜ ni_giti ni_giti ni_giti ǰâlolâ di ptomiš o sâip. norâi tâkbir, âska, benâmos bi dunio sâip di, âska_kâřo sâip. giti, bârgom giti sâip, pârea mânša vâsaŋařeaâ âkiste. pârea mânša vâsaŋařeati, lâmbâr iâk fârmon âkiste˜ i˜a sådir kâřo. lâmbâr iâk âkiste˜, nâ˜i de tubo, vâ·sa, fârmon âkiste strak ǧosi âmir kunam nâ˜i â? ni_giti bârgom gomiš â·ki, pâṣoa˜ vâsaŋařati gâis· ü teti gâǰâr imoa bâmbâri_kunâsi sâxta. řâdor gâi·sa ü teti sâip âska, ǧâmxur sta box to. e qånun streao i˜a âkiste. ina âmonât sta qånun ina ea âmir bulo âmir sta ea måvin bulo â·kiste tâškilot i·peati ča, â·kiste˜ ǧosi břok de âmir kâřo; â·kiste âske meṣ ča teti ea qumåndon âmniâ_kâřo ea qumåndon e ǰâhot kâřo ea gek kum âska tâškil i·peati ča, âmki oakuṇi nom_teti. quron_to šüt kâreati sua˜. imo di xionât nâ_kummo imo břâźo_âsamiš nâ nuristoni_kummo nâ guǰar_kummo nâ sâtra_kummo, ea břâźo bomiš, ṣuč kummo kti ča âmkio˜_to, âska lâtri pâa tâveati [slap sound of seal] pâa tâveati ča, â·kiste˜, strak pâṣuč, âska_koř buna [?].
â·ki de turća˜ turća˜ viri de biliuk âi, suara âmki viri de, qåbil de ina lâtri to źi·kar koř nâ_âi; ina imoa i˜a ǰe tu sta viri de bâdriŋo enta; kitop de biliuk oala i·poa˜ elo âkiste tu to di bor voňa âćlo, xulo·sâ viri ina_âsa ča˜, ina dârâ e sin, imo, i˜a ie sta [?] i˜ sta muǰo·idina˜ ie sta, nuriston mânšoa˜ ni [?] ie sta, ina biliuk kâṭavo tå·sir kâřo âkiste. i˜a ni giti â·ki, ǰâlolâ ni pře sta, mânšoa˜_to egek tå·sir kâřo sâip ča˜, nire âs·mor livo sta qumåndon, musalmon_âsi âbdurâ·uf nom vo mânša, âske to di hâq [?] pâido bo [xx] utro musalmon ṣṭâle˜ ina ǰâhota kunâsâ kti.
â·kiste˜, ea źâ˜vor sâip, ea vâsut ste˜, gâati to sumbulâ to vik puč mos o˜ć â·ki dârâ, o˜, pâmo nâ gom. â·ki ninša bom. nâři âtam oaźu, nâři inâar ča âćti, gâṇür ste˜ ča âćti âtam oaźu, pere, pere âćti âtam oaźu, âćti čare dukuliom, vâa_kâćeati â·ki berkuṭ u via, âni ninša ǰâhot ku˜ di [?], puč mos â·ki bom. i·a ǧosi meṣ â·ki ninša lâsti, kudüm kâroa˜ di [?] mânšoa˜.
âmna mânša, vidařanâsi, imo mânšoa˜ vâňati, âmna imo to vâpili☠âćanta kti. âmnoa˜ ina, råbitâ, lesta_kulom âmna, ina, i·a âsaka hu·kumât de ku·šaš kunâsi âmna, qoum bâ qoum mânšoa˜ kâla_kâreati âmu sta vâxt tâvâ·sir düŋe nâ˜i â? i˜a ina kudüm_kâřo ča, tu sta de âmna prugrom; i˜ sta ina prugrom_kti ča˜, o˜ć hâr gřoma˜_to giti giǰa_kunâsim, imoa bâkči·saň, šoa nâ źâňati_kâřastâi, ina šoa qâsdi nâ_kâřa·sa, šo vidařati_kârea·saň, šo to kâča di kâa mâṇla nâ_âi. šo imo sta břo_âsaň. kti sâip âmki, â·kiste ina ǰâhot to gâati âtam_kâćeao!
â·kiste niň poar sâip ina, kombřom ča utino, âduka bo. viri niň šuru_kâřo âkiste. i˜ sta ina viri nüštruk i˜a kâřa to, nâ_kâroa˜ ienâsa kâmkuř. ina imoa â·ki nire bândi bi·sa hu·kumât meṣ vâllâti â·ki niň â·ki bâǰâňato˜ gâana kti nâ višiâ. nâabo nüštruk ni âćti c̣arat niṣo ni_ṭikim_to i˜a giǰa_kâřo dućći moč i˜ meṣ âćaň; ina kâlea gâati ni gâati pâriṣ âtam oaźammo; â·kü ninša, imoa ina lâtri nâši bo, ina kâla â·kü ninša ubaǰana mânša âkiste, imo čo [?] šo sük io sta âtačbâra [?] ieloň_kâřa to, i˜ meṣ nâ višti sâip. ina imo to tâlâfot, i˜ sta viria nâ ŋâti mânšoa˜ âska_kâřo. xu sâr âz u di [xx] imo mânšoa˜ sta ina šåhâmât, ina imo mânšoa˜ sta źâra vo vor, i˜a vâňi·sa. âskea vâňati biliuk, xu·šol_âsam, mâgâr strak kâa? ṭâŋoa˜ pṭipâar_ienta. âmkio˜ sta isât, pṭipâar nâ ienta, o ine to xâ·pu_âsam. âska lâtri i˜_to bâźare uǰa biti, ina qoum_to, qoum_âsam_kunam nâabo ina qoum_to ste de mun·kir bu sta_âsi. ou˜.
ṣuc nire sâip, biliuk kâṭavo kâṭavo ṣuč bâ âkiste˜ â·ki. niň. e vor, nire, nâři âtam oaźiomiš sâip nâři âtam oaźti, ea kânḍâk imoa, nuristonia vino. ea kânḍâk oakuṇi ǰe sâtra e sunti bâṭa biti, qoum bâ qoum giti, â·ki pâa_kâći·samiš. viammo kti. o˜ de peň poar_âsim âni inâar sunti imoa bâṭa kti ǰea·si âaṭi. nuristonia vino âska. suara tuare˜ mi nâ dreaâ â·ki. imoa ǰe âmnoa˜, ina lâtri, âska_kâřa·sa o! målum bi·sa imo ǰe âmno˜ sta ina lâtri ne? źâravovor. ina ṣuč to. imo mânšoa˜_to přeati kâča di, źâravo nâ_âi. źâravo imo mânša âi. e xu â·ki bâdo ča utina sta biti, ina, źâra kâṣaň [?] vo âi. bâboźor vo [?] _âsa bo źâra, kâṣaň vo. bâbun ić! bâbun nâ vidařanta de kâia˜ vâňati. ou˜.
â·kiste suara dâfâ sâip nâři âtam oaźiomiš sâip. nâři âtam oaźti sâip, ea kânḍâk â·ki vino sâip. suara dâfâ, xu ča, âska, ea vâsdor imoa, ča dâfâ sâip â·ki hâmlâ_kâřâ âmki hâr hâmlâa˜_to, ea hu·kumâta, kâa de nâsuř peṭoanâsamiš kâa, damaři peṭoanâsamiš, kâa e gotr peṭoanâsamiš, ea âar čuřea viati ča˜, ča oaźti ienâsamiš. vâre imoa nâ kâča punrik přenâsi nâ kâča kâa přenâsi. fâqât âqamot, [?] imo sta kâmol ina_âsi ča, kuiu e to âtam oaźti vina to sâip â·kü e_sâma lâtri bâdüšt_ienâsi âmkio˜ meṣ sâip. [laugh] â·kiste˜ di, ṣuč ku ste zâminâ bârâbâr bunâsi. ou˜.
niň dârâ e sin_to, ṣuč di biliuk nâ pâmaṣṭa˜ iela ṣuč âi. biliuk lesta kâṭavo kâṭavo ṣuč kâřâ mânšoa˜. xu·su·sân imo mânšoa˜ biliuk, kâṭavo kâṭavo kudüm_kâřâ. âmki kâča âi? imo mânša. vili_gal sta, imo mânša. ču·kea sta. suara, â·kü mâret sta. âmna nire ṣârgal sta. suara, ćünuk sta de imo meṣ čaň, mu·âǰar bi sta_âsi. âa, ča âćti mâc̣imon, šâŋir. xu·su·sân âkiste âmna mâc̣imon sta, vâňi ǰe šâŋir vâňi e, imo sta qouma˜ pâmüč ina, gâṇürio e. ina qurboni pta·sa inea kâča di pře˜ nâ bânta. âmna čuk saři âni pâṣuč âćnâsi bo âmkioa˜ âmki buṭi přenâsi. gâṇür poar ča âćla saňi ketta_âsi bo âskea gâṇürio buṭi přenâsi; inâar šâŋir poar âćla kâča_âsi bo sâip âmkioa˜, sunti šâŋirio ǰe, mâc̣imon sta přenâsi. ina ǰâhot, âgâr i˜a giǰa_kâřa bo ina merak dârea˜_kâřa·sa_kâřa bo de. â·kiste, di giǰa_kula [?] ča˜, ina suara, âmu_šü˜ u_gâana_kunta. i·ea di nâ_kulo. mâgâr, imoa, i˜ sta totbřoa˜, ine to, biliuk ˀi·sâ ŋuta·sa. ina ilât ina_âsi ča, o˜ pânüš bi·sam nâ˜i â? o˜ pânüš bi·sam gek düŋe. ina, ina imo sta břo to imo bisât nâ bummo ina, âni ǰeṣ biti oa·sa kti sâip, âmna sunti, âmna kâa qurboni přenâsi bo xudâa düŋe_âsi, mâgâr i˜ sta, âčea˜ o˜š_kti kunâsi.
â·kiste sâip, [xx]·si i·a pâmüč u sâip â·ki bâre nâři, ea dâfâ âtam oaźimiš to sâip, â·ki imo nu duć, [dut, with following juncture] mânša muǰo·idin di mâřâ kâča tre što puč âni čaň imo sta muǰo·idin di mâřâ. tâbiât xârop bo âkiste âmki i˜ sta tâbiât to âaṭi sunti âip, âmna, bâ·sano mul biti âip, kâča buṭi kṭol, lesta nâ přeti sâip, eṭa vor bi to, âmki, imo bâdriŋo bunâsamiš nâ˜i â? â·ki di ǰukuř pârmaň âni ŋe [?] u_gâati bâdoa˜ bâřa·si sâip, buṭi pâa_âšala kâča nâ biti nâabo âmki imo totbřo sâip, gâṣ di ṣâřa di âveti utea·si. gâṣ âno nâ iummiš, kâřa to âṣea˜ ǰâňanâsi, âṣe âno nâ iummiš kâřa to gâṣa˜ mânâsi. âmkio˜ düŋe nivo mâňoa˜ ure â·ki sâip, â·ki bâdo ste sâip nivo mâňoa˜ âvenâsi imo sta âaṭia˜ düŋe. imo, âno bâṭa nâ iummiš imoa u štoana, top_âsa kti. imo düŋe nivo vřâk☠[?] to ste giti bâbun ste sâip, mâňoa˜_to ste imo düŋe nivo âvenâsi. ina qurboni_âsa ča. inea kâča ku˜ bânta â? âmna, ina e ǰâsbâ vřâkâna. sunti mânša, vâre di ke? nâ_kunâsi â·ki mu·šuâṇi di kor ṣâřa vo_âsi mânša_âsi lâtri_âsi, mânša, qoum_âsi. âmkio˜_to ina kudüm nâ_âsi. âmki di âćti imo buṭi iunta imo to ča_kâćti. ina gita sta mânša_âsi. iå kuiu poar vâre˜ sta kuiu xâirâti buṭi âvenâlla â kti ča âmki o˜š kunâsi. mâgâr imo mânša gita sta nâ_kâřo. imo mânšoa˜ biliuk, imât kâřo.
â·küste, âska vâsdor ter biti ča˜ sumbulâ bi to puč mos pṭipâar sâip o˜ â·kiste˜, hâmâl to gu·sim. âvâl e hâmâl to pü târi·sim; âni, nâŋar ste. ou, âvâl e sumbulâ, â·ki oasom sâip. puč mos fiks, i˜ sta, â·ki ter bâ. hâr dâfâ ǰâhot to gum_to, âska i˜ sta čok vos de tre mos bunâsi nâabo što mos puč mos, što mos puč mos â·ki bunâsim. o˜ giti mânšoa˜ muǰo·idin âveti sâip, nâři poar bâra âćti âmna nâřioa˜ meṣ vâllâti, nâři de tâslim_kulom, suara, ina hu·kumât âni ste˜ ni târoammo višti [xx], berkuṭ u de nire čaň, muhå·sarâ_kummo kti.
âćti nâŋar oa·sim de âkiste o˜š kunam bo â·ki mânša čaň, mânša ˀitifoq bummo, kti mânša vâsaŋařistâi tu düŋe âri oa·samiš_kti sâip mânša oasâ i˜_to! ea mânšoa˜_so nire o˜ muǰo·idina˜ nâčeati oa·sam â·ki ṣuč_âsa â·ki âska_âsa ina strak vâll☠viri nâ_âsa, ṣuč vel_âsa. de i˜a, biliuk kâřâ xu. [xx] ste nire pâšiŋar imo ćüř di sâip, xudâa bâkčalo ure kâmaron nâ_âsi â? âska. suara i·a i˜ sta nânbřo âǰa âbot kon bulo, âska i˜ sta mâǰam_tot pütras ˀis·moil. tre što puč, sunti mi oala oala kâšara_dâři âi_âsi [?] nâ˜i â? âmki. âmki âćti pâmo ǰenâ suara tü zârur imo vâllea·saš qouma˜ suara, tua ie sta buna kti giǰa_ku. ea˜ mâǰbur biti âkiste˜ pü ššiom âkiste hâ. trić vos â·ki vâsaŋařati sâip âmna mânšoa˜ sâip, ina, inea_kummo inea_kummo, faloni ǰeṣ bulo [?] tâškilot i·poammo. imo ina ǰâhot sta ǰeṣṭ, målum_kummo gita_kummo suara_kummo kti bâlla âmki. kombřom vâllâti sunti âćti, piti_gal vâsaŋařistâa, se kombřom sta di sâip, pâčoguli di sundi.
[R] â·ki vel to kombřom kâča bâ? saňi_âsi â?
[A] nâ˜i nâ˜i. kombřom de imoa ni toř_âšio nâ˜i â? âska ni toř_âšti âska vâsdor. ni toř_âšio, âska vâsdor sâip, â·kiste˜ âmki âćti â·ki vâsaŋaři sta bâlla. o˜ de bâkul ni bom nâ˜i â? puč mos i˜a â·ki bo. suara âmna čaň mânša suara imo sta âaṭi, imo sta muǰo·idin, nuriston sta sunti niň bunâsi i˜ meṣ nâ˜i â? tre što sât mânša, i˜ meṣ vâsdor niň bâ â·ki. suara pâta bi sta, âćti âni bokčâ to ste˜ berkuṭ u ina kumari_gal ǰe kuṇ bâra_kâćti, hu·kumâta vianâsi berkuṭ. âtam u tea·si.
â·kiste, ea˜ o˜ mâǰbur biti sâip âmna mânšoa˜ meṣ sâip, piti_gal gomiš o! piti_gal iemmiš bo sâip, trić_vos âmkioa˜ â·ki ǰârgâ kti, â·kiste imo düŋe nâčea sta bâlla âmki de oasa bo sunti, kummo kti. viria˜ [?] vâllâti. â·kiste pü ienam bo âkiste i˜_to giǰa_ku tü imoa, âska_kâřa·saš. qumondon_kâřa·saš_kti giǰa_ku. i˜a giǰa_kâřo qumondon de o˜ giâ˜_mi_âsam â·ki i˜ čat to, ṣuč kunam â·ki, âsam. šo de âni_âsaň o˜ć â·ki_âsam. o˜ qumondon qumondon nâ bunam o˜ přek mânša_âsam i˜ sta pârmaň de turća˜ âi. o˜ć, ina xudâa düŋe ǰâhota kuiu bâim bo kunam; nâabo nâ_kunam_kti nâ_kâroa˜_gom sâip. liṣṭiâ sâip sunti i˜_to sâip. tü kâakti qumondon nâ bula bunša suara tu düŋe, ina kudüm nâ_kunša bo tü, lea mânša nâ_â·ša bo [?], tü imo štâňa_â·ša o qoum, qoum tü gita_kunša o suara_kunša. e˜ mânšoa˜_so i˜a nâ kšaň o˜ dâlke˜ šoa vâňati ǰâhot kâroanam. â·kiste di i˜a ḍâkara_źâňanaň. šo imo mânšoa˜ sta ina qoidâ_âsa ea mânšea pânüš kula_âsaň; â·kiste âskea pṭipâar, pü teti, nuŋ ćioala_âsaň [?]. o˜ć ina kudüma nâ_kunam šo düŋe. xu, kâa kâřo, kâa kâřo âmna sunti ǰeṣ mi ǰeṣ de vâpali☠âćti sâip. tü de qumondon ṣuč sta imo sta boš_kti giǰa_ku; mulo rustum imo sta åmir bo kti giǰa_ku.
ina kea_kâřa·sa šoa kti i˜a kudoa sta bâ âkiste. tü ǰe mulo rustum pâmüč â·ki ptul kâṣkoṣ_âsi šo ečok bitifoq_âsaň. šo oadü lâṭea˜ ina lâtri to biň bo ina lâtri di, ina břâźo vor pâido bulo; suara imoa gek düŋe_kâřa·sa kti giǰa_ku. i˜a giǰa_kâřâ ina i˜a qâbul koř de nâ_âsi kti giǰa_kâřâ. gek düŋe mulo rustum nâ muǰohid_âsa nâ tâpka bâru˜ te˜ źâňala_âsa nâ kâi_âsa. i·a de i˜ sta ǰeṣṭ, o˜ć i·e sta qumondon i·a kâakti buna? â·kiste mânša ṭüṭü ptâ i˜_to biliuk. [xx] i˜a pi·kar kâřo, ina sâ·i_âsa, i˜ sta mâ·suliât čok bulo, i·e sta šaṭe˜ bulo višti.
â·kiste, qâbul_kti giti gek kum giti kombřom gomiš âkiste. pârea, pâčoguli. se pâčoguli âmna sunti vâsaŋařati di giti kombřom gomiš. kombřom giti sâip, mulo rustum vâlleao âkiste. mulo rustum nâ oa·si â·ki. âske to mânšoa˜ giǰa_kâřo imoa gita kti fâi·salâ_kâřa·sa kâa, mâṇanša_kâřa to âkiste, sâ·i_âsa kti kušol bo âkiste! âćti â·ki i˜a vâlloň oa·sa â·kiste, pâṣoa˜ i˜ meṣ biti "pâřučkol i˜ sta vičo_âsaň kti giǰa_ku. âvâl gâǰâr početr_âsa, pârea kâmkuř âskea vičo_kâřa·samiš âmna muhåǰar, ü târi mânša, âska pâṣoa˜ de â·ki, iâ·kup nom vo i˜ sta e leavâllâla âskea, go ǰâňati bâǰuṣânua kti, štra [?] ptâ mânša. umoňasa i˜ sta vičo_âsaň kti_giǰa_ku. âska ǰuṣ to, âska, mulo rustum. âkiste umoňasa â·ki ni giti, âska, â·ki, iemmiš_kti imo sâmaři·samiš pâřučkol mânše to giǰa_ku [?] mulo rustum de mukti gu·sa kti giǰa_ku âkiste. mukti gu·sa kti giǰa_ku. "kea mukti gu·sa_kummiš bo de "muki·sa kti giǰa_ku. âni eṭa mânšoa˜, liṣṭati âska_kâřa·sa kti giǰa_ku. "kâča mânšoa˜? âni, dâ·ut. dâ·ut nâ_âsa_â? dâ·ut nâ_kunta_â? eṭa, źâňanša_â? âska urbřom dâ·ut. âmki dâ·ut kiloa˜ âske to liṣṭati suara tü ǰe ou˜, tü de âloqâdor meṣ de imoa duṣmâni_kâreati, strak tü de mer bula âska de tu sta munâsir bula, suara, imo dâlke˜ přâmi ḍun âšoaloň. vâllâ âgâr tua imo pe utemmo bo, gita bummo suara_kummo kti vidařati âska bâřa·sa kti giǰa_ku. iå. âska nâ de âska vičaṣoa˜ bo âske bâdüš nâ di kâa bo sâip â·kiste mukio sâip.
ea˜ muki to âkiste˜ sâip mânšoa˜ vâsaŋařati sâip, ṭoŋ dâstikar âkiste åmir kâřo. ṭoŋ dâstikar åmir kâřo âkiste.
â·küste ča˜ âska mulo rustum bâra_giti mukti giti sâip gulbudin_to âćti âni sâip přâmi vâňeati sâip, ina, pârea břâźa qoum_to âvařo! â·ki vik inâar ina, nâ mânšoa˜ źâňanâsi kâča nâ kâi_âsi nâ kâča kâi_âsi. â·kiste, gulbudin de šoa źâňanâsi? gulbudin de âmna gita sta lâtria˜, ina břâźea xudâa to vřâkânâsi. â·kiste i˜a, xudaâ to vřâkânâsi ča i˜ sta muqobil to e muqobil dâ·us [?] â·ki vik de, kuiu put nâ vâňâti_âsi â? âska. â·ki ste mulo rustum sâip, kâča tâpka přeti kâča, ǰal přeti kâča kâa přeti sâip, âskea pâteati sâip âveti â·ki imo to e břâźea pâido bi[xx]. čâkčala âmkioa˜ břâkźa imoa ina viri â·kü vik nâčoa.